Constitutio

CONSTITUTIO

Sub tutela Beatissimae Virginis Mariae, Dei Matris Almae,
et sub protectione omnium Angelorum et Sanctorum,
et sub speciali invocatione
SANCTI HIERONYMI
quem nobis in Patronum ac patrem seligimus spiritualem,
cum fuerit
Summo Pontifici sincerrime deditus
Fidei Catholicae defensor acerrimus
in exponendis Sacris Scripturis doctor eximius
vitae spiritualis verbo et opere magister praeclarus
atque Latinitatis Ecclesiasticae auctor uberrimus,
in festo Beatissimae Virginis Mariae de Monte Carmelo
die 16 mensis Julii A.D. 1989
nos infrascripti condidimus consociationem quam
FAMILIAM SANCTI HIERONYMI
apellare voluimus

[CAP. I] DE CONSOCIATIONIS FINE.

Cujus consociationis membra fieri possunt omnes fidei Romanae Catholicae homines, qui una nobiscum in hunc finem sibi constituendum consentiant, ut

[1] Sincerum amorem erga Summum Pontificem et filialem oboedientiam erga ejus Supremum Magisterium Ecclesiasticum profiteantur;

[2] Vitam spiritualem quae ad intimam cum Deo unionem conducit secundum tot Sanctorum doctrinam et eorum vestigia sequentes intense et fideliter colant;

[3] Linguam Latinam vivam, Romanae Ecclesiae propriam, sedulo studio et cotidianis exercitiis ita discere satagant, ut tandem facile et expedite tum Latine scripta legere, cum et cogitare et loqui et scribere Latine valeant.

[CAP. II] DE MEDIIS AD FINEM CONSEQUENDUM ADHIBENDIS.

[1] De unione spirituali cum Summo Pontifice.

Omnes Familiae Sancti Hieronymi membra

[a] pro posse documenta a Summo Pontifice edita fideliter legant;
[b] ea quae a Summo Pontifice in gubernanda Ecclesia aguntur perspecta habeant;
[c] orationes pro Summo Pontifice cotidie fundant.

[2] De vita spirituali convenienter alenda.

Omnibus Familiae Sancti Hieronymi membris, ut vitam spiritualem convenienter alant - praeter sanctae missae sacrificium, sacram communionem et frequentem peccatorum confessionem - exercitia spiritualia quae sequuntur enixe commendantur:

[a] Lectura spiritualis sive Lectio divina, nempe conveniens tempus cotidianum quo meditative sive contemplative, id est lente et in spiritu orationis tum Sacra Scriptura cum Scripta Sanctorum ita lagantur, ut paulatim nobis in succum et sanguinem transeant;

[b] Oratio mentalis, intima nempe semper et ubique possibilis conversio animae ad Deum; quae oratio et lectionem spiritualem praecedat oportet et ex ea profluat et magis magisque in diem perduret;

[c] Inter ceteras orandi formas primum locum obtinet sanctum Marianum Rosarium, quo maxima fidei nostrae mysteria in unione cum Beatissima Virgine Dei Genitrice Maria a nobis recoluntur; accedat, in quantum possibile sit, recitatio Liturgiae Horarum sive ex toto sive ex parte quam quisque sibi pro posse selegerit (v. gr. Laudes, Vesperae, Completorium).

[3] De studio et usu linguae Latinae.

Ut omnes Familiae Sancti Hieronymi membra in cogitando et loquendo, in legendo et scribendo paulatim ad facilem et expeditum linguae Latinae usum perveniant, firma spe freti - memores illius proverbii "GUTTA CAVAT LAPIDEM" - cotidiana exercitia numquam omittant.

Haec autem exercitia se extendunt ad ea quae sequuntur:

[a] Illa Familiae Sancti Hieronymi membra, qui nullum hucusque vel fere nullum habent linguae Latinae usum, varios adhibeant "Cursus linguae Latinae vivae" sive manualia in hunc finem edita, sive etiam Latinas Romanae pronuntiationis capsas magnetophonicas, ut linguam Latinam vivam discere valeant.

[b] In quantum possibile sit, omnes Familiae Sancti Hieronymi membra Summi Pontificis Encyclicas et Litteras Apostolicas, Documenta Concilii Vaticani II et cetera ecclesiastica documenta Latine legant.

[c] Pro lectione quoque spirituali Bibliam adhibeant editionis Vulgatae Latinae; itemque Latine legant sanctos Patres Ecclesiae, itemque medii aevi sanctos vitae spiritualis atque verae theologiae Catholicae magistros, inter quos summus eminet sanctus Thomas Aquinas.

[d] Sanctum Rosarium Marianum, Liturgiam Horarum, ceterasque preces privatim fusas Latine recitent; occasiones vero assistendi sanctis missis Latine celebratis ne omittant; immo, ubi hoc sine lite et bello et odio pacifice fieri potest, ipsi quoque, ut sanctae missae Latine celebrentur, occasione data humanissime proponant.

[e] Inde ab initio omnes satagant acquirere consuetudinem Latine cogitandi et ea quae jam sciunt Latine exprimendi.

[CAP. III] DE FAMILIAE SANCTI HIERONYMI COMPAGINE ET DISPOSITIONE ORGANICA.

Praeambulum.

Familiae Sancti Hieronymi compago et dispositio organica - cum Romanae Catholicae fidei homines utriusque sexus, omnis aetatis, cunctorum ordinum vel officiorum vel munerum, universarum quoque nationum ad hanc Familiam attracti et vocati esse possint - sat ampla et diversis vitae conditionibus adaptanda sit oportet.

[1] De Cenaculis Sancti Hieronymi.

[a] Haec tota et universalis Familia Sancti Hieronymi in partes dividitur, quae singulae certum numerum membrorum et aliquam ubi haec membra congregentur sedem comprehendunt. Hae partes singulae atque earum sedes appellantur

CENACULA SANCTI HIERONYMI

[b] Universa Cenacula Sancti Hieronymi, quae juxta locorum conditiones ceterasque circumstantias sat varia esse possunt, secundum praecipuam earum indolem et structuram in tria distinguntur genera: Cenacula enim Sancti Hieronymi sunt alia ORDINARIA, alia SCHOLASTICA, alia tandem MONASTICA. Quae tria genera, in circulis quasi concentricis disposita, totam Familiam Sancti Hieronymi constituunt.

[2] De Cenaculis Sancti Hieronymi Ordinariis.

[a] Ubi aliquot Familiae Sancti Hieronymi membra in quadam vicinia habitant, pro posse satagant statutis temporibus in loco apto convenire, ut et in communi Latine orent et inter se Latine colloquantur.

In locis ubi fieri potest, convenit ut communiter assitant s. missae sacrificio Latine celebrato, secundum normam cap. III., par. 3, litt. d hac de re datam.

Hae aliquot membrorum Familiae Sancti Hieronymi congregationes atque earum sedes appellantur

CENACULA SANCTI HIERONYMI ORDINARIA.

[b] Quamvis ordinarie unumquodque membrum Familiae Sancti Hieronymi alicui Cenaculo adscribatur atque cum ceteris hujus Cenaculi membris in statuta sede congregetur statutis temporibus, tamen ex Familia Sancti Hieronymi non excluduntur illi, qui a ceteris hujus Familiae membris ita sejuncti vivunt, ut propter distantiam locorum ad nullam alicujus Cenaculi sedem se conferre possint.

[c] Qui in talibus circumstantiis versantur, Familiae Sancti Hieronymi adhaerere et ejus membra esse possunt, dummodo fideliter observent ea quae cap. I. et cap. II. hujus Constitutionis de membrorum obligationibus dicta sunt. Insuper ligamen et unionem cum Familia Sancti Hieronymi, quocumque modo possunt, colant atque sustentent.

[3] De Cenaculis Sancti Hieronymi Scholasticis.

[a] Optandum est ut adjuvante Dei gratia secundum diversas locorum conditiones

CENACULA SANCTI HIERONYMI SCHOLASTICA

quoque condantur, talia nempe ubi activitates permanentes fini hujus consociationis consentaneae exerceri possunt, communi quorundam saltem membrorum labore sustinendae, uti sunt:

scholae linguae Latinae vivae
editiones librorum vel foliorum Latinorum
editio capsarum magnetophonicarum vel audiovisificarum Latinarum
et cetera hujusmodi.

[b] Tota Familia Sancti Hieronymi haec Cenacula Scholastica magni faciat, atque Cenacula quoque Ordinaria his Cenaculis Scholasticis adjutorio esse et illis pro posse operam dare satagant.

[4] De Cenaculis Sancti Hieronymi Monasticis.

[a] Centrum totius Familiae Sancti Hieronymi constituitur ab illis qui, a Deo vocati, in una domo simul in communi viventes solis orationibus et studiis sacris vacant. Singulae hujus generis communitates appellantur

CENACULA SANCTI HIERONYMI MONASTICA.

[b] Harum communitatum sodales non tantum in orationibus et studiis sacris, sed etiam in cotidianis laboribus et colloquiis sola lingua Latina utantur.

[c] Ceterum haec Cenacula Sancti Hieronymi Monastica reguntur propria ipsorum Regula et Normis propriis, secundum praescripta Codicis Juris Canonici, congrua congruis referendo.

[CAP. IV] DE FAMILIAE SANCTI HIERONYMI SEDE, REGIMINE, AGGREGATIONE MEMBRORUM ATQUE BONIS TEMPORALIBUS.

[1] De Sede.

[a] Sedes totius consociationis quae "Familia Sancti Hieronymi" nuncupatur - nisi posteriore tempore aliter videbitur - pro nunc ille intelligitur locus ubi haec consociatio condita est, nempe Aquae Clarae Floridianae (i.e. Clearwater, Florida, U.S.A.)

[b] Hanc Sedem totius Familiae Sancti Hieronymi in alium locum transferre competit auctoritati Consilii Generalis.

[c] Ad auctoritatem Consilii Generalis quoque pertinet quaestionem de Sede aliter definire atque, praeter Sedem principalem et sub illa, Sedes forte regionales erigere et quid illis competat statuere.

[2] De Regimine.

[a] Toti Familiae Sancti Hieronymi paterne praeest PRAESES GENERALIS, cui in munere assistunt DUO CONSILIARII. Qui tres una simul CONSILIUM GENERALE efficiunt. Consilium Generale jus habet alia quoque membra sibi in hoc munus asciscendi.

[b] Ab ipso Consilio Generali omnia negotia ad totam Familiam Sancti Hieronymi attinentia expediuntur. Item a Consilio Generali ad negotia expedienda alii quoque officiales nominari possunt.

[c] Si unus ex membris Consilii Generalis vel justa de causa officio renuntiaverit vel vita functus fuerit, a ceteris Consilii Generalis membris nominatur substitutus.

[d] In singulis Cenaculis Sancti Hieronymi negotia omnia in spiritu verae familiae in quantum fieri potest concorditer et collegialiter expediantur.

[e] Ad regimen Cenaculorum Sancti Hieronymi Monasticorum quod attinet, servantur leges Codicis Juris Canonici atque Normae propriae a competenti Ecclesiae auctoritate approbandae.

[3] De aggregatione membrorum atque de fidelitatis proposito et promissione.

[a] Qui homines Familiae Sancti Hieronymi nomen dare atque ei ut membra aggregari possint, cap. I., paragraphis 1-3 hujus Constitutionis statutum est.

[b] Candidatus incipit esse membrum Familiae Sancti Hieronymi a die quo rescriptum aggregationis a Concilio Generali datum est.

[c] Novum membrum, cum rescriptum aggregationis petit, adjuvante Deo triplicem hujus Familiae Sancti Hieronymi finem fideliter prosequendum promittat; quod fidelitatis propositum in corde suo frequenter renovare consuescat.

[d] Unumquodque Familiae Sancti Hieronymi membrum, postquam per triennium triplici hujus consociationis fini fideliter adhaesit, promissionem suam in quodam cenaculo Sancti Hieronymi, aliis Familiae Sancti Hieronymi Membris praesentibus, publice recitando solemniore ritu renovet atque confirmet.

[e] Formula autem promissionis est haec:

"Adjuvante Deo Omnipotenti, Beatissimae Virgini Mariae atque Sancto Hieronymo, patrono nostro, ego promitto

imprimis sincerum amorem et filialem oboedientiam erga Summum Pontificem ejusque Supremum Magisterium,

deinde studium vitam spiritualem quae ad intimam cum Deo unionem conducit secundum tot Sanctorum doctrinam et eorum vestigia sequens intense et fideliter colendi,

tandem studium cotidianis exercitiis bene discendi et usu provehendi linguam Latinam vivam, Ecclesiae propriam."

[f] Aggregatio ad Familiam Sancti Hieronymi cessat:

libera declaratione membri se consociationem relinquere velle;
dimissione a Consilio Generali justa de causa alicui membro intimato.

[4] De bonis temporalibus.

[a] Tota Familia Sancti Hieronymi jus habet acquirendi, possidendi, administrandi bona temporalia. Haec bona in utilitatem totius consociationis administrantur a Consilio Generali quo tota Familia Sancti Hieronymi repraesentatur.

[b] Unumquodque Cenaculum Sancti Hieronymi bona temporalia acquirere, possidere, administrare potest; de modo, quo haec bona administrentur, singula Cenacula decidere valeant.

[c] Si Familia Sancti Hieronymi dissolvitur, ejus bona in possessionem alius Instituti Religiosi a Concilio Generali in actu dissolutionis determinandi transferuntur.

[5] De normis particularibus.

Consilium Generale minutas normas vel regulationes particulares, quae ei opportunae videbuntur, edere potest.

Datum apud AQUAS CLARAS FLORIDIANAS, in Solemnitate Beatissimae Virginis Mariae de Monte Carmelo, A.D. MCMLXXXIX.

(Juxta canonem 322 Codicis Juris Canonici approbatum ab Episcopo John C. Favalora, Dioecesis Petropolitanae Floridianae, rescripto dato die 5 Decembris 1990.)

DECLARATIO AUTHENTICA PRIMA

Declaramus ea quae capite III hujus Constitutionis sub n. 2, litt. b et c dicuntur, ita intelligenda esse ut pleno jure membra Familiae Sancti Hieronymi fieri possint omnes Catholicae fidei personae quae nobiscum consentiunt in triplicem finem hujus Familiae, nempe ut

sincerum amorem et filialem oboedientiam erga Summum Pontificem profiteantur;
vitam spiritualem quae ad intimam cum Deo unionem conducit secundum Sanctorum exempla fideliter colant;
linguam Latinam vivam, Ecclesiae propriam, magni aestiment.

Non ergo requiritur a singulis ut

per singulos dies intensis exercitiis Latinis ita dediti sint ut hanc linguam mox perfecte calleant. Sufficit enim alta aestimatio hujus linguae, quae est Ecclesiae propria, et - inquantum sine incommodo fieri potest - studium discendi saltem pauca, v. gr. quosdam textus s. Missae et quosdam cantus liturgicos.

Neque requiritur a singulis membris ut

ullam activitatem specialem sibi assumant ad quam se impares sentiunt.

Neque requiritur (ut jam capite III n. 2 litt. b hujus Constitutionis explicite dictum est) ut

singula membra statutis temporibus conveniant vel ad quoddam cenaculum in aliquo loco erectum pertineant. Sufficit ut, quocumque modo possint, ligamen et unionem praesertim spiritualem cum tota Familia Sancti Hieronymi colant et ea quae cap. I et II dicta sunt ad mentem DECLARATIONIS ALTERAE servent.

DECLARATIO AUTHENTICA ALTERA

Declaramus ea quae capite II, numeris 1, 2, et praesertim 3 (de studio et usu linguae Latinae) dicta sunt non intelligenda esse in sensu enumerationis taxativae quae singulis membris omnia ibidem enumarata facienda imponit.

Nisi enim agatur de illis mediis ad vitam spiritualem alendam quae omnes Catholicae fidei homines obligant (uti sunt s. Missae sacrificium, sacramentalis confessio, s. communio, obligatio orandi et cetera hujusmodi), enumeratio mediorum ad triplicem hujus Familiae finem consequendum ita intelligenda est ut agatur de exemplis e quibus singuli sibi seligant ea quae et fini nostro consentanea et sibimet ipsis convenientia sint.

Quod autem ad linguam Latinam discendam attinet, in Declaratione Authentica Prima rem ita definivimus ut nemo principiis Familiae Sancti Hieronymi consentiens exclusus sit ne membrum fieri possit.

Quicumque vero patienti et perseveranti studio ad majorem vel etiam perfectum linguae Latinae usum pervenire possit, haec studia ne omittat, sed singulis diebus saltem ad breve tempus iis fideliter incumbat. Sacerdotes vero, nostrae Familiae membra, memores sint canonis 249 novi Codicis Juris Canonici qui illis praescribit ut linguam Latinam bene calleant.

DECLARATIO AUTHENTICA TERTIA

His qui sincero corde membra Familiae Sancti Hieronymi fieri desiderant, sed ex aliqua ratione nondum omnia praerequisita, ut pleno titulo membra fieri possint, compleverint, judicio Consilii Generalis accipi possunt ut "membra associata."

Qui "membra associata" ea quae in eorum potestate sunt fideliter complere satagant secundum normas et spiritum totius Familae Sancti Hiernymi; ea autem quae quacumque de causa complere non vel nondum valeant, misericoridae Domini commendabunt.

Si autem futuro tempore impedimenta priora fuerint remota, nihil obstat quin membrum associatum, juxta caput IV, par. 3, hujus Constitutionis, fiat membrum plenum Familiae Sancti Hieronymi. Quod si membrum associatum hoc velit, a Consilio Generali, nuntio hac de re dato, plenam aggregationem petat.